لمقطع بالحليب (خاص بعيد الفطر )

السلام عليكم ورحمة الله وبركاته  

المقطع  بالحليب

أكلة شعبية  

خاصة  بعيد الفطر المبارك  

وهي عبارة عن :

كنت حنحط  الموضوع من غير  مقادير 

لأني مش عارفة  ولا نعرف انديره

كالعادة نعرف ناكل  أو بس  

وخفت نسأل امي  تقولي  ياا بايرة  D:

فأستعنت بموقع مسجلة فيه خيتي سلم خيتي 

وخذيت المقادير اللي هي حاطتهن 

:) 

بالنسبة للعجينة مقاديرها هي:

 دقيق وميا وملح وكمية الميا على حسب العجينة اللي لازم تكون يابسة شوي

بعد العجن نخلوها اتريح شوي بيش اتساعدنا في الفرد 
هنا قطعتها أختي كور وبعدين حطتهن على مفرش بيش تتريح

 بعدين نجيب مكينة المقطع او الباستا

 كيف ما تبوا ونفردوها على اول رقم وبعدين على ثالث رقم، مش المفروض انها تكون رقيقة



بعدين نحطوها في القطاعة

بعد انقطعها نقعد انرش عليها دقيق كل بين فردة والثانية عشان ما تلصقش

نكون بهالوقت مسخنة اميا ع النار ونحطلها ملح ع حسب رغبتكم

وبس تغلي حطوا المقطع شوي شوي عشان ما يلتصقش في بعضه ونبدا نحرك براحة وبعد 10 دقايق نكون مسخنة الحليب حوالي لترين ونحطه عليه ونخليه شوي بيش يخثر معاه

                               اخر شي نحطها في الرباعات

                                ونحط عليها السمن او الزبدة
                                      والرب لو تحبوا

نا  ناكل فيه من غير رب 

باتي وأختي الصغيرة  لازم  من وجود الرب

وكل حد وذوقه

صحتين  صحتين  

O.o

والله كل عيد فطر  لازم في حد ضحية ووحدة تقعد ما تمشيش اتصلي
 لأننا  نمشو للمصلى 

ولا بد أن  لما نروحو م الصلاة نلقو  لمطقع  جاهز  وساخن  

وعيد الفطر اللي فات  كان ممزوج  بفرحة تحرير طرابلس  

وحتى اللي ما كلش  ما عدلش 

؛ 

ودمتم في حفظ الله  

:)